Hvernig Google notar mynstursgreiningu

Hvernig Google notar mynstursgreiningu til að bera kennsl á myndir

Tölvur „sjá“ ekki myndir og myndskeið á sama hátt og fólk. Þegar þú skoðar mynd sérðu ef til vill besta vin þinn fyrir framan húsið sitt. Frá sjónarhóli tölvunnar er sama mynd einfaldlega gagnahrúga sem hún túlkar kannski sem form og upplýsingar um litagildi. Þótt tölvan bregðist ekki við á sama hátt og þú þegar þú sérð myndina er hægt að þjálfa tölvuna til að þekkja tiltekin mynstur lita og forma. Til dæmis væri hægt að þjálfa tölvu til að þekkja algeng mynstur forma og lita sem finna má í stafrænni mynd af andliti. Þetta ferli er þekkt sem andlitsgreining og er sú tækni sem gerir Google kleift að vernda friðhelgi þína í þjónustu á borð við götusýn, þar sem tölvur reyna að finna andlit fólks sem kann að hafa staðið úti á götu þegar bíllinn sem tekur myndir fyrir götusýna ók framhjá og gera þessi andlit óskýr. Þetta er líka það sem hjálpar þjónustu eins og Google+ myndum að stinga upp á að þú merkir mynd eða myndskeið þar sem andlit virðist vera til staðar. Andlitsgreining segir þér ekki andlit hvers er um að ræða en getur hjálpað þér að finna andlit á myndunum þínum.

Ef farið er dýpra í málin er hægt að nota sömu tækni og knýr andlitsgreiningu til að hjálpa tölvunni að þekkja tiltekna eiginleika andlitsins sem greindist. Tiltekin mynstur geta t.a.m. bent til þess að andlitið sé skeggjað eða beri gleraugu eða búi yfir svipuðum eiginleikum. Upplýsingar á borð við þessar er hægt að nota til stuðnings við eiginleika eins og lagfæringu á rauðum augum eða til að gera myndina skemmtilegri með því að setja yfirvararskegg eða einglyrni á réttan stað á andlit þitt þegar þú ert í Hangout.

Google notar andlitsgreiningartækni einnig í tilteknum öðrum eiginleikum. Andlitsgreining getur, eins og heitið gefur til kynna, hjálpað tölvu að bera þekkt andlit saman við nýtt andlit og sjá hvort líkleg samsvörun eða svipur finnst. Andlitsgreining hjálpar t.d. notendum eiginleikans Finna andlitið mitt að sjá tillögur um fólk sem þeir kunna að vilja merkja á mynd eða í myndskeiði sem viðkomandi hefur hlaðið inn og vill deila. Fáðu frekari upplýsingar um Finna andlitið mitt í hjálparmiðstöð Google+.

Hvernig raddleit virkar

Raddleit gerir þér kleift að senda talaða fyrirspurn inn í Google leitarforrit í tæki í stað þess að slá hana inn. Raddleitin notar mynstursgreiningu til að umrita talað mál sem skrifaðan texta. Fyrir hverja raddfyrirspurn sem berst í gegnum raddleit geymum við tungumálið, landið, það sem sagt var og það sem kerfið giskaði á að sagt hefði verið. Vistuðu hljóðgögnin innihalda ekki Google reikningsauðkennið nema þú hafir valið slíkt. Við sendum ekkert sem sagt er til Google nema þú hafir lýst yfir vilja til að nota raddleitareiginleikann (t.d. með því að ýta á hljóðnematáknið í flýtileitarstikunni eða á sýndarlyklaborðinu eða með því að segja „Google“ þegar flýtileitarstikan gefur til kynna að raddleitareiginleikinn sé í boði). Við sendum það sem sagt er til netþjóna Google til að greina það sem þú sagðir. Við geymum það sem sagt er til að bæta þjónustu okkar, þ. á m. til að þjálfa kerfið okkar í að þekkja betur rétta leitarfyrirspurn.