Forðastu svik

Nei, sennilega vannstu ekki í lottóinu. Þú getur ekki grætt svona mikið á að vinna heima. Og þetta tilboð er líklega í alvörunni of gott til að vera satt.

Vefurinn getur verið frábær staður en ekki allir á netinu hafa gott eitt í hyggju. Hér eru þrjár einfaldar leiðir til að forðast svikahrappa og vera örugg(ur) á netinu:

Varastu gjafmilt ókunnugt fólk

Skilaboð sem óska þér til hamingju með að vera milljónasti gestur vefsvæðis, bjóða þér spjaldtölvu eða önnur verðlaun fyrir að taka þátt í könnun eða kynna fljótlegar leiðir til að græða peninga eða fá vinnu boða yfirleitt ekkert gott („Þú getur orðið rík(ur) á örskotsstundu með því að vinna heiman frá þér í tvo tíma á dag!“). Ef einhver tilkynnir þér að þú sért vinningshafi og biður þig um að fylla út eyðublað með persónuupplýsingum skaltu ekki freistast til að fylla það út. Jafnvel þótt þú ýtir ekki á hnappinn til að senda inn eyðublaðið gæti verið nóg að skrifa inn upplýsingarnar til að svikahrappar komist yfir þær.

Ef þú færð skilaboð frá einhverjum sem þú þekkir sem virðast ekki koma frá viðkomandi aðila er mögulegt að brotist hafi verið inn á reikning hans/hennar og að hér sé á ferðinni glæpamaður sem vill peninga eða upplýsingar frá þér – gættu þín því á því hvernig þú bregst við. Dæmi um algeng brögð er að biðja þig um að senda peninga sem fyrst, segjast vera strandaglópur í öðru landi eða halda fram að símanum hafi verið stolið og því sé ekki hægt að hringja í viðkomandi. Í skilaboðunum gætirðu einnig verið beðin(n) um að smella á tengil til að sjá mynd, lesa grein eða horfa á myndskeið, sem í raun færir þig á síðu sem kann að stela upplýsingunum þínum. Hugsaðu áður en þú smellir!

Kannaðu málið

Þegar þú verslar á netinu skaltu kynna þér seljandann og vera á varðbergi gagnvart grunsamlega lágu verði rétt eins og þú myndir gera ef þú værir að kaupa eitthvað úti í búð. Gaumgæfðu tilboð á netinu sem hljóma of vel til að vera sönn. Enginn vill lenda í því að vera blekktur til að kaupa falsaðan varning. Þeir sem lofa dýrum vörum eða þjónustu ókeypis eða á 90% afslætti hafa líklega eitthvað vafasamt í hyggju. Ef þú notar Gmail gætirðu tekið eftir viðvörun efst á skjánum þegar þú opnar skeyti sem kerfið okkar álítur sviksamlegt. Ef þú sérð þessa viðvörun skaltu hugsa þig tvisvar um áður en þú bregst við.

Hafðu augun opin gagnvart svikamyllum sem merkja sig með vörumerki Google. Google stendur ekki fyrir happdrætti. Við innheimtum ekki þjálfunargjöld frá nýjum starfsmönnum – ef þú færð tölvupóst sem tilkynnir þér að þú hafir verið ráðin(n) til Google en þurfir að greiða þjálfunargjöld áður en þú hefur störf er það svikamylla. Varaðu þig á fólki sem segist selja bíla í gegnum Google Wallet. Kynntu þér nánar ýmsar svikamyllur sem nota vörumerki Google.

Ef þú ert í vafa skaltu sýna aðgát

Hefurðu slæma tilfinningu gagnvart auglýsingu eða tilboði? Þú skalt treysta slíkum tilfinningum. Smelltu aðeins á auglýsingar fyrir eða kauptu vörur af vefsvæðum sem eru örugg, hafa fengið umsagnir og er almennt treyst.

Mörg verslunarkerfi á netinu standa fyrir áætlunum fyrir trausta söluaðila. Slíkir söluaðilar hafa yfirleitt vottunarmerkingar sem eru sýnilegar á upplýsingasíðu þeirra. Gakktu úr skugga um að stimpill eða vottun sé lögmæt með því að skoða leiðbeiningar og reglur verslunarkerfisins. Ef verslunarkerfið býður ekki upp á slíka áætlun skaltu kanna fjölda og gæði umsagna um söluaðilann.

Og ef þú smelltir á eða sást vafasama auglýsingu á Google skaltu láta okkur vita svo við getum brugðist við.